प्रियंका चोपडाको फिल्म ‘अनुजा’अस्करको मनोनयनमा

९७ औं अस्कर अवार्डका लागि मनोनयनको घोषणा गरिएको छ। बिहिबार राति २३ विधामा मनोनयन सार्वजनिक गरिएको हो।

जसमा फिल्म ‘एमिलिया पेरेज’ सर्वाधिक १३ विधामा मनोनयन भएको छ। त्यसैगरि, ‘द ब्रुटालिस्ट’ र ‘विकेड’ समान १० विधामा छनोट भएका छन्। ‘अ कम्प्लिट अननन्’ र ‘कन्क्लेभ’ समान ८ विधामा छानिएका हुन्।

यसपटक एसियाका फिल्म भने कुनैपनि विधामा छनोट भएका छैनन्। यद्धपी, हिन्दी भाषामा बनेको भारतीय-अमेरिकी फिल्म ‘अनुजा’ ले उत्कृष्ट लाइभ एक्सन सर्ट फिल्मको विधामा स्थान पाएको छ।

यस फिल्मलाई भारतीय अभिनेत्री प्रियंका चोपडा र गुनीत मोंगाले संयुक्त रूपमा निर्माण गरेका हुन्। यस विधामा १८० फिल्ममध्ये ५ मात्र मनोनयनमा परेका छन्। फिल्म १७ अगस्ट २०२४ मा रिलिज भएको थियो। विशेष कुरा के छ भने फिल्मको मूल भाषा हिन्दी हो।

हलिउडमा फैलिएको डढेलोको कारण अस्करको मनोनयन घोषणा २ पटक सारिएको थियो। मार्च २ मा अस्कर अवार्ड समारोह आयोजना गरिने बताइएको। विगत केही वर्ष झैँ यसपटक पनि लस एन्जलसमा समारोह आयोजना गरिने भएको छ।